ໃນວັນທີ 30 ກັນຍາ 2022 ນີ້, ກົມລົດຕັງ-ຍານເກາະ ກົມໃຫຍ່ເສນາທິການກອງທັບ ລະນຶກຫວນຄືນມູນເຊື້ອ ວັນສ້າງຕັ້ງເຫຼົ່າຮົບລົດຕັງ-ຍານເກາະ ຄົບຮອບ 61 ປີ ( 1 ຕຸລາ 1961-1 ຕຸລາ 2022 ) ຂຶ້ນ ຢູ່ທີ່ກອງພັນໃຫຍ່ 661 ໃນພິທີທີ່ມີຄວາມໝາຍຄວາມສໍາຄັນນີ້ ໂດຍການເຂົ້າຮ່ວມຂອງສະຫາຍ ພົນຈັດຕະວາ ບົວວັນ ບຸດທະຈັນໂທ ຫົວໜ້າກົມລົດຕັງ-ຍານເກາະ ກົມໃຫຍ່ເສນາທິການກອງທັບ, ມີຄະນະພັກ-ຄະນະບັນຊາກົມ, ກອງພັນໃຫຍ່ 661, ກອງພັນ, ພ້ອມດ້ວຍບັນດາສະຫາຍ ພະນັກງານອາວຸດໂສ-ບໍານານຂອງເຫຼົ່າຮົບລົດຕັງ-ຍານເກາະ, ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.
ໂອກາດນີ້ ສະຫາຍ ພົນຈັດຕະວາ ບົວວັນ ບຸດທະຈັນໂທ ໄດ້ຫວນຄືນມູນເຊື້ອອັນສະຫງ່າອົງອາດຂອງເຫຼົ່າຮົບລົດຕັງ-ຍານເກາະ ແມ່ນໜຶ່ງໃນກຳລັງປະກອບອາວຸດຂອງກອງທັບປະຊາຊົນລາວ ໃຕ້ການຊີ້ນຳ-ນຳພາໂດຍກົງຮອບດ້ານຂອງພັກປະຊາຊົນປະຕິວັດລາວ, ເປັນພາຫານະອັນແຫຼມຄົມຂອງພັກໃນການດຳເນີນພາລະກິດຕໍ່ສູ້ປະຕິວັດປົດປ່ອຍຊາດກໍ່ຄືພາລະກິດປົກປັກຮັກສາ ແລະ ສ້າງສາປະເທດຊາດ, ຍ້ອນຄວາມຮຽກຮ້ອງຕ້ອງການຂອງປະເທດຊາດ ແລະ ຂະບວນການຕໍ່ສູ້ ຂອງປະຊາຊົນບັນດາເຜົ່າຕ້ານການຮຸກຮານຂອງຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່, ໂດຍໃຕ້ການນຳພາອັນປີຊາສາມາດ ແລະ ສະຫຼາດສ່ອງໃສຂອງພັກປະຊາຊົນປະຕິວັດລາວ, ກ່ອນໜ້ານີ້ຄື ໃນວັນ ທີ 1 ຕຸລາ ປີ 1961 ເຫຼົ່າຮົບລົດຕັງ-ຍານເກາະ ກອງທັບປະຊາຊົນລາວ ໄດ້ຮັບການສ້າງຕັ້ງຂື້ນຢ່າງເປັນທາງການຢູ່ທີ່ເຂດຄັງໄຂ ທົ່ງໄຫຫີນ ແຂວງຊຽງຂວາງວິລະຊົນ, ກອງຮ້ອຍ 161 ເຊິ່ງເປັນກົມກອງທໍາອິດ ຂອງເຫຼົ່າຮົບລົດຕັງ-ຍານເກາະ ໄດ້ເຮັດໜ້າທີ່ຕາມການມອບໝາຍຂອງພັກຢ່າງສົມກຽດ ເຖິງວ່າກຳລັງຍັງອ່ອນນ້ອຍ, ແຕ່ຍ້ອນນໍ້າໃຈຮັກຊາດອັນສູງສົ່ງຂອງນັກຮົບປະຕິວັດ, ພະນັກງານ-ນັກຮົບເຫຼົ່າຮົບລົດຕັງ-ຍານເກາະ ໄດ້ອອກແຮງແຂ່ງຂັນເປັນເຈົ້າການເຄື່ອນໄຫວຕີສັດຕູຢູ່ທຸກສະໜາມຮົບຢ່າງພິລະອາດຫານ,
ທັງສູ້ຮົບທັງກໍ່ສ້າງກຳລັງໄປພ້ອມໆກັນ, ຍິ່ງສູ້ຮົບຫຼາຍທໍ່ໃດກຳລັງກໍ່ຍິ່ງເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ຈາກພຶດຕິກໍາທາງການເຄື່ອນໄຫວສູ້ຮົບເຊິ່ງໃນເບື້ອງຕົ້ນກໍາລັງຂອງພວກເຮົາມີບໍ່ເທົ່າໃດຄົນ ການປະກອບພາຫະນະບໍ່ຫຼວງຫຼາຍ ແຕ່ພາຍໃຕ້ການນຳພາຂອງພັກ ເຫຼົ່າຮົບລົດຕັງ-ຍານເກາະ ພວກເຮົາໄດ້ຮັບການກໍ່ສ້າງແລະ ປັບປຸງໃຫ້ເຕີບໃຫຍ່ຂະຫຍາຍຕົວທັງດ້ານປະລິມານ ແລະ ຄຸນນະພາບຢ່າງບໍ່ຢຸດຢັ້ງ, ມີຄວາມອົງອາດກ້າຫານບໍ່ຫວັ່ນໄຫວຄອນແຄນຕໍ່ຄວາມລໍາບາກທຸລະກັນດານໃດໆ. ຍິ່ງສູ້ຮົບຫຼາຍເທົ່າໃດກໍ່ຍິ່ງເຕີບໃຫ່ຍເຂັ້ມແຂງ ແລະ ສາມາດຕີເອົາຊະນະສັດຕູໄດ້ຮັບໄຊຊະນະເປັນກ້າວໆ. ເຊິ່ງຜ່ານໄລຍະການຕໍ່ຜູ້ຊາດຕ້ານຈັກກະພັດຜູ້ຮຸກຮານອັນຍືດເຍື້ອຍາວນານຜ່ານມາໄດ້ເຮັດໃຫ້ນັກຮົບລົດຕັງ-ຍານເກາະພວກເຮົາ ມີຫຼາຍສະຫາຍ ໄດ້ຮັບນາມມະຍົດເປັນວິລະຊົນແຫ່ງຊາດ, ເປັນນັກຮົບແຂ່ງຂັນທີ່ດີເດັ່ນ ໃນການຈັດຕັ້ງລະນຶກຫວນຄືນມູນເຊື້ອຂອງເຫຼົ່າຮົບຂຶ້ນ ເພື່ອແນ່ໃສ່ປູກລະດົມ ພະນັກງານ-ນັກຮົບ ເຊື່ອມຊຶມຢ່າງເລິກເຊິ່ງ ທາດແທ້ມູນເຊື້ອອັນສະຫງ່າງາມ ຂອງກອງທັບ ໂດຍສະເພາະມູນເຊື້ອຂອງເຫຼົ່າຮົບລົດຕັ້ງ-ຍານເກາະ ກອງທັບປະຊາຊົນລາວ ຕະຫຼອດໄລຍະ 61 ປີຜ່ານມາ.
ໂອກາດດຽວກັນນີ້, ຍັງໄດ້ປະດັບຫຼຽນໄຊພິລະອາດຫານຊັ້ນ III ໃຫ້ ທ່ານ ນາງ ພິຈິກາ ປະດາວົງ ບໍລິສັດມາສະເຕີເທຣດລາວ ຈໍາກັດຜູ້ດຽວ ທີ່ໄດ້ອຸປະຖໍາການ ກໍ່ສ້າງເດີ່ນກິລາກອງພັນໃຫຍ່ 661 ແລະ ຂະບວນການຂໍ່ານັບຮັບຕ້ອນວັນສ້າງຕັ້ງເຫຼົ່າຮົບລົດຕັງ-ຍານເກາະ ຄົບຮອບ 61 ປີ ແລະ ວັນສ້າງຕັ້ງກອງພັນໃຫຍ່ 661 ຄົບຮອບ 6 ປີ (ມູນຄ່າ 90 ລ້ານກີບ) ແລະ ໄດ້ມອບໃບກຽດຕິຄຸນຂອງກອງພັນໃຫຍ່ 661 ໃຫ້ ຄອບຄົວທ່ານ ດອນ ຊຸກຍູ້ຂະບວນການ 4 ລ້ານກວ່າກີບ ແລະ ຄອບຄົວ ທ່ານ ຜາຫວັງ ອຸປະຖໍາເຄື່ອງກິລາ 3 ລ້ານກີບ.
ຂ່າວ-ພາບ: ອາຫວຸ້ນ